Fries

Tink derom!
Dizze opdracht moatst meitsje by it lêzen fan it boek. Dus begjin mei de opdracht foardatst mei it boek úteinsetst.

1. Lês It neidiel fan ‘e twivel oant side 33 en skriuw yn in pear sinnen op hoe'tst tinkst dat it ferhaal fierder gean sil? Doch itselde nei side 87 en nei side 111.

2. Foar hoefier kaam it plot yn It neidiel fan ‘e twivel oerien mei dyn ferwachtings? Oer wat in plot krekt is, lêst yn de boarne (sjoch hjirûnder).

3. Fûnst it plot fan de roman foarsisber of net? Lis út.

Plot, Basisboek literatuur, Peppelenbos, Temme en Joosten, Grins, 2020

Of fia dizze link: Plot - Wikipedia

1.
Betink fiif fragen dy’tst oan Bas stelle wolle soest oer syn útwikseling nei Italië. Bygelyks: Wat is dyn moaiste ûnderfining by de Materazzi’s? Wêrom soest, mei de kennis fan no, wol of net wer nei Italië ta gean?

Soargje derfoar datst iepen fragen stelst. Dyn fragen begjinne dus mei hoe, wat, wie, wêrom, wêrom, wannear. 

2.
Betink wat de antwurden fan Bas binne op dyn fragen en skriuw dy op.

3.
Wurkje de antwurden op dyn fragen út en doch krekt as hast Bas echt ynterviewd. Fertel yn in vlog fan minimaal 2 minuten, dy’tst mei dyn telefoan opnimst, hokker antwurden Bas op dyn fragen jûn hat.

A.
1. Wannear en wêr kinsto it bêst dysels wêze?
2. Hasto wolris it gefoel datst net dysels wêze kinst? Wêr leit dat dan oan?

B.
Bas nimt ferskillende rollen oan yn dit ferhaal. Dy fan soan (fan syn mem), grutte broer, learling, klassegenoat, gast en freon. By guon minsken hâldt er him grut en by oaren docht er krekt as makket it him neat út wat se fan him fine.

Sykje trije oerienkomsten yn syn gedrach en trije ferskillen yn de petearen dy’t er hat mei de ferskillende minsken. Hjirûnder is in rige mei minsken wêr’tst in kar út meitsje kinst. Kies yn alle gefallen trije persoanen út. Jou oan op hokker side ast it petear fûn hast.

C.
By wa kin Bas it meast himsels wêze, tinkst? Is dat bygelyks syn mem, de dokter of Julia of noch in oar. Wêrom tinkst dat? Underbou dyn antwurd mei op syn minst 80 wurden.

A.
1. Bas hat him net opjûn foar de útwikseling nei Italië. Hy hat meardere redenen om net dy kant op te wollen of te gean. Hokker redenen hat er? Beneam trije.
2. Wêrom giet Bas úteinlik wol op útwikseling? Ferklearje dyn antwurd yn op syn minst 75 wurden.

B.
Fertel wat der neffens dy bard mei de heit fan Bas is. Wa hat der neffens dy skuld oan dy situaasje en wêrom? Brûk op syn minst 100 wurden.

C.
Julia en Bas binne in bysûndere kombinaasje. Neidat se útnaaid binne om sa te foarkommen dat Bas nei hûs werom moat, giet it hielendal mis mei dy twa. Wat tinksto dat der te rêden is mei Julia? Is har heit echt sa’n rare man? Hat Julia Bas nedich om har te beskermjen? Ferklearje dyn antwurd yn op syn minst 150 wurden.

D.
De siswize is: It foardiel fan ‘e twivel krije, mar dit boek hjit It neidiel fan ‘e twivel.

1. Op hokker plakken krijt Bas it foardiel fan ‘e twivel? Besjoch foar it antwurd op de fraach de antwurden dy’tst jûn hast op boppesteande fragen.
2. Yn hokker gefallen krijt Bas it neidiel fan ‘e twivel? Besjoch foar it antwurd op de fraach de antwurden dy’tst jûn hast op boppesteande fragen.
3. Begrypsto wêrom it boek It neidiel fan ‘e twivel hyt? Ferklearje dyn antwurd mei op syn minst 80 wurden.

A.
Nei it lêzen fan it boek hasto fêst in miening foarme oer it hâlden en dragen fan Bas. As lêzer fine je gau ien aardich of net.

1. Wat fynsto positive eigenskippen fan Bas? Is hy bygelyks aardich, hulpfeardich of sosjaal? Beneam trije en jou oan yn hokker situaasje as dy eigenskippen nei foaren kommen binne.
2. Wat fynsto negative eigenskippen fan Bas? Is hy bygelyks ûnaardich, negatyf en noartsk? Beneam trije en jou oan yn hokker situaasje as dy eigenskippen nei foaren kommen binne.
3. Hokker eigenskippen wage foar dy it swierst? Soe Bas in freon fan dy wêze kinne? Ferklearje dyn antwurd yn op syn minst 150 wurden.

B.
Op wikipedia stiet:

Dat in antyheld:

Maklik, laf of egoïstysk is;

Troch minsklike gebrekken werkenber is;

Realistysker is as in held.

Jou oan oftst fynst dat Bas past by (dielen fan) boppesteande omskriuwing. Ferklearje dyn antwurd yn op syn minst 100 wurden.

C.
Lês de teory oer helden en antyhelden fan DBNL. Sjoch de link hjirûnder.

1. Beskriuw dêrnei oft Bas in held of in antyheld is as it giet om wat Bas belibbet mei Julia. Beskriuw earst koart wat der bard is en ferklearje dêrnei dyn antwurd. Brûk op syn minst 100 wurden.
2. Beskriuw dêrnei oft Bas neffens dy in held is as it giet om wat der bard is mei syn heit. Beskriuw earst koart wat der bard is en ferklearje dêrnei dyn antwurd. Brûk op syn minst 100 wurden.

Besjoch dyn antwurden by opdracht A, B en C. Wat is dyn einoardiel? Is Bas in held of in antyheld? Ferklearje dyn antwurd yn op syn minst 150 wurden. Begjin dyn antwurd mei: Bas is in held/antyheld omdat …

antiheld Algemeen letterkundig lexicon - DBNL
Antiheld - Wikipedia

Lês de resinsje fan heitenmem.nl oer It neidiel fan ‘e twivel: De resinsje fan Corrie: It neidiel fan ‘e twivel » heit&mem (heitenmem.nl)

A.
1. Binne der wurden yn de resinsje dy’tst net kenst? Skriuw dy wurden op en sykje de betsjutting fan de wurden op op frysker.nl. Sykje yn alle gefallen de betsjutting op fan de wurden: ienselvich, dryst en gnize.

B.
Yn de resinsje stiet dat de lêzer:

• gau meilibbet mei Bas
• meinommen wurdt yn de spanning fan it meitsjen fan beslissingen
• op it ferkearde spoar setten wurdt troch de wikseling fan de tiid dat Bas’ heit noch libbe en de tiid yn Italië.

Bisto it mei boppesteande saken iens? Ferklearje dyn antwurd mei op syn minst 150 wurden.

C.
It neidiel fan ‘e twivel hat de priis foar bêste Fryske berne- of jongereinboek fan 2022 wûn. De sjuery seit oer it boek:

"Yn dit aktuele, skerpe, ferrassende en yntrigearjende ferhaal bliuwt lang yn ’e midden wat der no krekt te rêden is. En sels oan de ein bliuwe der noch fragen oer, want, hoe soe it no fierder gean? I.E. Bloem boartet hiel tûk mei de lêzer en mei de feiten dy’t er wol en net sjen lit. In bysûndere oanwinst foar de jeugdliteratuer."

1. De sjuery jout trije arguminten:
a. It is in aktueel, skerp, ferrassend en yntrigearjend ferhaal;
b. Lang bliuwt yn it midden wat der krekt te rêden is en sels oan de ein bliuwe der noch fragen oer;
c. E. Bloem boartet hiel tûk mei de lêzer en mei de feiten dy’t er wol en net sjen lit.
2. Jou oan oftsto it iens bist mei de arguminten. Beneam se ien foar ien.

D.
Meitsje in booktok fan it neidiel fan ‘e twivel. Yn dy booktok fertelst:

• Koart de ynhâld fan it boek;
• Dyn miening oer it boek;
• Trije arguminten dy’t dy miening ûnderstreekje.

De booktok kinst opnimme mei dyn telefoan.