Fries | niveau 1 | Trettjin dagen om in spetterjend feest te organisearjen

Meitsje in opfallende poster oer Tretjin dagen om in spetterjend feest te organisearjen. De poster is bedoeld om it boek ûnder de oandacht fan lêzers te bringen. De poster moat net allinne de oandacht lûke en der moai útsjen, it moat ek in yndruk jaan fan de ynhâld fan it boek.

Soargje dat ûndersteande saken op de poster komme te stean:
- titel;
- auteur;
- in sitaat út it boek;
- in beoardieling (dyn beoardieling);
- in yllustraasje (dat mei net itselde wêze as de omslach fan it boek!).

Tip: Yn Word hast handige sjablonen om in poster te meitsjen.

Yn dizze opdracht silst ien fan de belangrike persoanen fierder útdjipje. Hjir hast de ynhâld fan it boek foar nedich, mar út en troch ek wat fantasij. It is de bedoeling datst in soart fan hânlieding makkest. Alle fragen fynst yn de opdracht.

1. Kies oer wa’tst dizze opdracht meitsje wolst: Marike, har freondinne Nadine of har broerke Peter. Set dy namme boppe-oan de útwurking fan dizze opdracht.

De hânlieding:

Begjin de hânlieding mei in yntroduksje fan de persoan dy’tst keazen hast. Wa is it, hoe âld is hy/sy en betink in leuk of grappich feitsje. (Bygelyks wat hy/sy it lekkerst fynt of in favoryt bist of favorite kleur)

Nim dêrnei ûndersteand skema oer en folje yn:

Oplieding:

Wenplak:

Hobby’s/ynteresses: (Wat docht dizze persoan yn syn/har frije tiid?)

Favorite film/searje: (Wat is it sjenre of de spesifike titel dêr’t dizze persoan fan hâldt? Bygelyks in horror of romantyske film)

Sterke punten: (Wat binne kwaliteiten dy dizze persoan hat? Wat kin hy/sy goed?)

Swakke punten: (Wat fynt dizze persoan dat hy/sy net goed kin? Wêr fynsto dat dizze persoan wol oan wurkje mei?)

Libbensmoto/spreuk: (Welke spreuk soe goed by dizze persoan passe. Tink bygelyks oan Doch mar gewoan, dan dochst al gek genôch of It komt wol goed.)

Ideale útsje mei freonen: (Wat soe dizze persoan it leafste dwaan mei syn/har freonen?)

Doelen: Betink twa doelen dy’t dizze persoan hat. Dat meie doelen wêze oer hoe’t hy/sy is en docht, mar ek doelen oer wat dizze persoan yn de takomst dwaan of wêze wol.

Skriuw yn op syn minst 30 wurden op wêrom’tst foar dizze persoan keazen hast. Wat binne de oerienkomsten en ferskillen tusken dy en de persoan dy’tst beskriuwst?

Stel dy foar dat de skriuwer fan it boek dy frege hat om dit boek te promoatsjen troch it meitsjen fan in promoasjefilmke.

1. Besjoch it filmke mei de boekpromoasje oer it boek Nova Scotiastaazje fia dizze link: De Nova Scotia staazje - Lezen voor de lijst
2. Ast sa’n filmke makkest oer Trettjin dagen om in spetterjend feest te organisearjen wat moat der dan yn? Skriuw 4 dingen op. Tink bygelyks oan it einfeest of de itensiederskeunsten fan Marike.
3. Betink yn op syn minst 50 wurden wat ast fertelle wolst oer it boek oan de ein fan it filmke.
4. Skriuw hiel koart op wat ast allegear filmje wolst en sykje minsken dy’t meidwaan wolle yn dyn filmke.
5. Nim dyn promoasjefilmke op. It mei maksimaal 3 minuten duorje.
6. Ast wiis bist mei it resultaat, dan meist it ek opstjoere nei gerlsma@nhlstenden.com, wa wit sette wy it dan op de webside fan lezenvoordelijst.nl. Set dan yn it ûnderwerp fan dyn mailtsje filmke 13 dagen.

Besjoch de foarkant fan Trettjin dagen om in spetterjend feest te organisearjen en beäntwurdzje de folgjende fragen.

1. Wat fynst fan de foarkant fan it boek?
2. Underbou it antwurd fan fraach 1. Doch dit troch yn alle gefallen ien argumint te jaan. Bygelyks: Ik fyn de foarkant fan it boek moai, omdat der in soad kleuren op brûkt binne.
3. Wêrom steane der allegear cupcakes op de foarkant fan it boek? Lis dyn antwurd út mei yn op syn minst 15 wurden.
4. As der in nije druk fan it boek komt, kin der ek in oare foarkant makke wurde. Meitsje de nije foarkant. Do meist hjirfoar in foto meitsje, in tekening of knutselje mei kleurd papier.

Yn dizze opdracht makkest in toanieltekst. Lês haadstik 9 goed troch. Wat yn dat haadstik lient him goed foar in toanieltekst? Rin ûndersteande stappen troch om ta in moaie tekst te kommen:

1. Wat wolst oerbringe? Wolst it hawwe oer de relaasje fan Remco en Marieke of oer wat der mei Peter oan de hân is? Of giet dyn sêne oer de heit fan Peter en Marike? Jou antwurd yn op syn meast 100 wurden.
2. Betink goed wa’t in plakje hawwe moatte yn de sêne. Meitsje it net te grut en brûk maksimaal 4 persoanen. Skriuw harren nammen en de belangrykste karaktereigenskippen út. Bygelyks: Remco tink foaral oan fuotbal.
3. Betink in struktuer. In ferhaal hat altyd in ynlieding, kearn en in slot.

Yn de ynlieding lizze de persoanen út wa’t se binne en wat harren ‘probleem’ is.

Yn de kearn moat wat barre. As der in rúzje is dan bart dat hjir. De persoanen reagearje op wat der allegear oan de hân is.

Yn it slot komt it goed en wurdt neist in oplossing ek in konklúzje jûn. Bygelyks makket Peter it goed mei syn mem en seit sy dat se yn de takomst better om him tinke sil.

4. Lês alle eardere punten troch en betink dan de dialogen. Wa seit wat tsjin wa en mei hokker wurden. In folwoeksene praat faak oars as in jongere. Skriuw in dialooch mei op syn minst 10 sinnen.
5. Jou regy-oanwizingen. Betink by de dialogen hoe’t de persoanen prate, stean, hoe’t se sjogge of hokker gebaren se meitsje.
6. Probearje de dialogen út. Moatst noch wat oanpasse?

Meist dizze opdracht ynleverje as tekst, mar meist ek in filmke meitsje fan hoe’t it útspile wurdt.

Peter fielt him troch it hiele boek hinne in bútensteander. Hy hat in soad rúzje mei syn heit en mem en op skoalle liket er der ek bûten te fallen. Lês haadstik 8 nochris.

1. Nei de safolste rúzje set Peter mei triennen yn de eagen ôf (side 70). Tink dy yn datsto Peter bist.
2. Skriuw in deiboekferhaal fan op syn minst 150 wurden oer de sneon fan haadstik 8 út de eagen fan Peter wei en jou yn alle gefallen antwurd op de folgjende fragen:
   1. Wat is der presys bard op dy sneon neffens Peter?
   2. Wat fynt Peter fan de rúzje mei syn mem?
   3. Wêrom jout Peter Marike in skop ûnder de tafel?
   4. Hoe fielt Peter him?
   5. Is der wat wat Peter in oare kear oars dwaan wol? Wat soe dat wêze?
3. Betink hoe’tsto in goede freon foar Peter wêze kinst. Soest him ek advys jaan? Typ in leaf berjochtsje foar Peter datst him stjoere kinnen hiest fia Whatsapp, Signal of SnapChat.