Fries

Stel dy foar De lêste trúk soe ferfilme wurde.

1. Skriuw fiif plakken op dêr't sênes har ôfspylje.

2. Neam trije dingen dy't karakteristyk binne oan elk plak. Brûk by dyn antwurd sitaten of fragminten út de roman en ferwiis nei de bledsidenûmers.

3. Yn watfoar Frysk doarp soe in ferfilming fan De lêste trúk him ôfspylje kinne? Neam de namme fan in echt besteand doarp en lis dyn antwurd út oan de hân fan in foto (foto's) of in plattegrûn.

De mem fan Henkie, Klaske de Vries, spilet in kaairol yn de oplossing fan de moard op Ernie Oosthuizen. Kinst ynformaasje oer har fine op de siden 13-15, 18, 35-36, 41-42, 62, 77, 87, 128, 207, 212, 217-224.

1. Tekenje har sa'tst har foar dy sjochst. Plak der fiif plaatsjes by dy't by har passe, bygelyks klean, kleuren, spullen dy't se hat, hoe't se wennet, relaasjes, bern. Nûmerje de plaatsjes.

2. Sykje by elk plaatsje in passend sitaat út de roman en lis op dy manier út wêrom't it plaatsje karakteristyk is foar har, sa'tsto har sjochst.

3. Sis yn ien wurd watst fan har fynst.

De lêste trúk is it ferhaal fan resjersjeur Evert. Hy wurket oan twa saken. Hy is op syk nei de moardner fan syn sweager Ernie én hy wol witte wêrom't twa auto's de feart ynriden binne. De roman hâldt it midden tusken in snackbarromance en in plysjeroman.

1. Wat heart by welke ferhaalline? Set in krúske yn de kolom dêr't it tekstfragmint by heart.

2. Is der in personaazje yn de roman dat beide ferhaallinen ferbynt? Lis dyn antwurd út oan de hân fan bewizen út de roman.

3. Wêrom komt de prolooch op side 6 werom op side 214?

Beantwurdzje de folgjende fragen:

Plysjeresjersjeur Evert is al hiel lang befreone mei Henkie.

1. Neam fiif bynammen fan Henkie.

2. Besjoch de foarkant fan it boek. Past dy by it ferhaal?

3. Henkie spilet Tommy Cooper-acts. Wa wie Tommy Cooper? Besjoch ien act fan him op YouTube. Skriuw op watfoar filmke oftst besjoen hast.

4. Neam trije typyske gewoanten fan Henk.

5.  Is de Henk yn it earste haadstik fan de roman (Tommy Cooper) deselde as de Henk yn it lêste haadstik fan de roman (Tommy Cooper!)?

6. Wêrom stiet der in útropteken achter de titel fan it lêste haadstik?

7. Wêr giet Henk syn eigen boek oer? Belûk yn dyn antwurd de skeanprinte fragminten op side 78-80, 198-203.

1. Googelje de skriuwer Ferdinand de Jong.

2. Wêrom hat de skriuwer dit ferhaal sa op papier setten, tinkst? Lis dyn antwurd út oan de hân fan de ynformaasje dy'tst op ynternet fûn hast.

3. Lês it motto op de earste side. Wat is it arkje fan Rink? Wat binne foar dy tsien bepalende wurden yn dit motto? Skriuw se op.

4. Ferdinand de Jong seit yn in ynterview: 'Foar heech-literêre teksten bin ik fierstente dom… Myn boeken moatte lêzen wurde, dêr doch ik it foar. It is moai meinaam dat de minsken dêrtroch nochris wat Frysk ûnder eagen krije.' (LC 16-02-2012).

Jou oan op wat foar manieren Ferdinand de Jong mei De lêste trúk besiket om in breed publyk te lûken. Sykje dêr trije bewizen foar yn de tekst.

Oan 'e ein fan it ferhaal, yn it haadstik 'Tommy Cooper!', wurdt ferteld oer de show dy't Henkie opfiert yn de bibleteek fan syn doarp en as er syn boek presintearret.
Opdracht: do bist sjoernalist by de pleatslike krante en dochst ferslach fan it programma. Skriuw in kranteberjocht tusken de twahûndert en trijehûndert wurden en jou koart en feitlik wer wêr't it programma út bestie en wat de achtergrûn dêrfan wie. Foar it lêste moatst goed witte wat wichtich is yn it ferhaal.