Fries

1. Kies trije personaazjes út it boek dy't neist Emily in belangrike rol hawwe yn it boek. Lis koart út wêrom't se belangryk binne.

2. Meitsje in beskriuwing fan Emily. Beskriuw sawol har inerlik as it uterlik. Dat meist dwaan mei wurden, mar meist ek gebrûkmeitsje fan plaatsjes (út tiidskriften of fan ynternet) of tekeningen. Set ûnder dyn beskriuwing in karaktertrek fan Emily en neam in foarbyld út it boek dêr't dy karaktertrek nei foaren komt. Set de side fan it foarbyld derby.
Ast bygelyks seist dat Emily moedich is, kinst ferwize nei it momint dat sy yn de trein stapt nei Grins om dêr minsken te treffen dy't se allinnich fan it ynternet ken (s. 86).

3. Doch no itselde foar ien fan de oare persoanen dy'tst by fraach 1 neamd hast.

4. Hoe is de relaasje tusken Emily en de oare persoan dy'tst beskreaun hast? Feroaret dy relaasje troch it boek hinne?

5. Bliuwt Emily troch it boek hinne deselde persoan of fynsto dat se feroaret?

En hoe sit dat by de persoan dy'tsto by fraach 3 beskreaun hast? Lis dyn antwurd út.

Van Balen, Joosten en Peppelenbos. Basisboek Literatuur, Grins 2009, side 247-248.

1. Beskriuw sa dúdlik mooglik hoe't it boek derút sjocht. Wat stiet der op de foarkant? Watfoar plaatsje is brûkt? Watfoar kleuren? Beskriuw it sa, dat ien dy't it boek noait sjoen hat in folslein byld krijt.

2. Betink no wêrom't it boek der sa útsjocht as dat it der útsjocht. Wêrom is keazen foar dat plaatsje en dy kleuren, tinkst? Beskriuw de relaasje tusken de foarkant en de ynhâld fan it boek.

3. Wat fynsto fan de foarkant fan it boek? Kies minstens twa wurden út it listje hjirûnder en ljochtsje ta wêrom'tst dy wurden passend fynst.

moai
eigentiidsk
fris
âlderwetsk
ferrassend
apart
oansprekkend
saai
famkesachtich
spannend

4. Lês no de tekst achterop it boek (de 'flaptekst'). Wat fynst fan dy tekst? Slút er goed oan op de ynhâld fan it boek? Stiet it wichtichste der neffens dy yn? Ljochtsje dyn antwurd ta.

5. De lêste sin fan de flaptekst is: 'En der is noch wat dat Emily ûnder eagen sjen moat.' Wat moat se ûnder eagen sjen?

Van Balen, Joosten en Peppelenbos. Basisboek Literatuur, Grins 2009, side 249.

1. Sykje op ynternet op wat 'eudaimoania' (Nederlânsk: eudaimonia) betsjut en lis yn eigen wurden út watst fûn hast. Jou by dyn antwurd de link fan de website(s) dy'tst brûkt hast foar dyn antwurd.

2. Lis út wêr'tst oan sjen kinst dat Emily stribbet nei eudaimonia. Wat dochst dy om dat te berikken?

3. Kies no in personaazje út Emily har famylje en ien fan bûten har famylje. Stribje sy ek nei eudaimoania? Lis dyn antwurd út en brûk dêr foarbylden út it boek by.

4. Faak wurdt sein dat it goed is om de balâns te sykjen tusken twa utersten. Tusken neat doarre (it iene uterste) en gjin gefaren sjen (it oare uterste) sit moedich wêze (it midden). Fynsto dat it Emily slagget om de balâns te finen tusken dy twa utersten? Wêrom wol of net? Lis dyn antwurd út.

5. Wat is dyn manier om te stribjen nei eudaimoania?

6. Slagget it Emily om eudaimoania te berikken oan de ein fan it boek? Lis dyn antwurd út. 

Dizze opdracht kinst allinnich dwaan of yn in twatal. Ast de opdracht yn in twatal dochst, dogge jim fraach 1 tegearre en fraach 2 en 3 ferdiele jim: de iene betinkt de fragen, de oare betinkt de antwurden.

1. Oan de ein fan it boek is Emily in hiel oar famke as oan it begjin fan it boek. Beskriuw hoe't Emily nei har eigen uterlik sjocht oan it begjin fan it boek en hoe't dat is oan de ein fan it boek.

2. In oare feroaring is dat Emily yn de rin fan it boek dingen doart dy't se earder net doard hie. Neam dêr twa foarbylden fan. Neam ek de sidenûmers.

3. Tink dy no yn datst in meet & greet hast mei Emily nei har reis nei Tailân. Do meist har ynterviewe. Betink minimaal seis fragen dy'tst har stelle kinst. Gean yn dyn fragen yn op de feroaringen dy't sy trochmakke hat.

4. Stel de fragen oan Emily en betink sels de antwurden dy't se jaan kinne soe. Soargje dat Emily har antwurden oanslute by wat der yn it boek bart en libje dy sa goed mooglik yn.

Van Balen, Joosten en Peppelenbos. Basisboek Literatuur, Grins 2009, side 248.

1. Lês de resinsjes dy'tst fynst op de website fan Sirkwy, bygelyks dy fan Jaap Krol yn it Friesch Dagblad of dy fan Doeke Sijens yn de Leeuwarder Courant. Kies ien fan de resinsjes út dy'tst fynst ûnder 'boarnen'.

2. Skriuw in brief of in mail oan de resensint dêr'tst yn reagearrest op dy syn resinsje. Hjirûnder sjochst in foarbyld foar in begjin fan dyn stik. Dat meist brûke, mar it hoecht net. Hâld dy oan de regels foar saaklik skriuwen en besykje sa oertsjûgjend mooglik te wêzen.

Achte Sijens, bêste Doeke,

Krekt as jo ha ik it boek Eudaimoania lêzen en graach soe ik reagearje wolle op de resinsje dy't jo oer dat boek skreaun hawwe. Ik bin it op trije punten (net) hielendal mei jo iens.
It earste punt is ...

tresoar.nl

Yn de flaptekst fan it boek stiet as lêste sin: "En der is noch wat dat Emily ûnder eagen sjen moat."

1. Wat is datjinge dat Emily ûnder eagen sjen moat?

2. It antwurd op de foargeande fraach komt pas yn it alderlêste haadstik oan it ljocht. Dochs fernimst yn it boek al earder dat der wat oan de hân is, bygelyks yn it kontakt tusken Emily en Henk, mar ek troch wat der yn Tailân bart. Neam minstens twa mominten yn it boek datsto fernimst dat Emily benaud is foar (guon) mannen. Neam ek de sidenûmers.

3. De skriuwer fan it boek, dy't anonym bliuwe wol, hat yn in ynterview witte litten dat er him ynspirearje litten hat troch Hoe ik nu leef fan Meg Rosoff en De belevenissen van een muurbloem fan Stephen Chbowsky. Beide boeken binne oerset út it Ingelsk nei it Nederlânsk. Sykje op ynternet op wêr't dy boeken oer geane. Watfoar oerienkomsten sjochst tusken dy boeken en Eudaimoania? Jou de links fan de websites dêr'tst dyn ynformaasje fûn hast.

4. As der in ferfolch op Eudaimoania komme soe, wat tinkst dan dat Emily yn dat ferfolch meimakket? Doch krekt of bisto de skriuwer fan it boek en betink hoe't it fierder giet mei Emily. Nim dêryn yn alle gefallen it aspekt mei dat yn de earste fragen fan dizze opdracht oan it ljocht kaam. Hoe giet Emily dêr mei om? Hoe giet it fierder mei de relaasje tusken Henk en har mem? Komt it noch goed tusken Emily en Erik? Sjocht Emily Lovegan en Patrick noch? Giet se fierder mei it meitsjen fan YouTube-fideo's? Dyn antwurd moat minimaal 200 wurden befetsje.